Сен тилсимли сирли фаришта,

Ечилмаган жумбоқсан ишқда,

Икки қалбни боғловчи ришта,

Ёниқ қалбга ошно муҳаббат.

Сен деб сувда оққан Тоҳирлар,

Жонин фидо этган ботирлар,

Ғазал битган неча шоирлар,

Ёниқ қалбга ошно муҳаббат.

Давраларда эслашар сени,

Яхши сўз-ла безашар сени,

Юз ёшда ҳам қўмсашар сени,

Ёниқ қалбга ошно муҳаббат.

Асрлардан келган нидосан,

Шоҳу гадо кўнглига жо сан,

Яна қа-а-нча қалбда яшайсан,

Сенсан умри боқий муҳаббат.

Кимлар битмас сен ҳақингда байт,

Нега бунча мафтункорсан айт,

Соғинчларим сенга йўллар хат,

Муҳаббат,

               Муҳаббат,

                              Муҳаббат!

Такрорланмас мафтункор кўклам,

Муҳаббатга ошно бўлган дам,

Севинч ёши киприкдаги нам,

Ўн саккиз ёш сеҳрли олам.

Бу дам ўзни тутишлар ўзга ,

Ширин хаёл суришлар ўзга,

Висол онин кутишлар ўзга,

Ўн саккиз ёш сеҳрли  олам.

Сенда эсган сабо ёқимли,

Севги куйи наво ёқимли,

Ёмғирли кун ҳаво ёқимли,

Ўн саккиз ёш сеҳрли олам.

Камалакдек жилоларинг кўп,

Ишқ дардига даволаринг кўп,

Мирзо Анвар, Раъноларинг кўп,

Ўн саккиз ёш сеҳрли олам.